Orí ọ̀kẹ́rẹ́ koko láwo

Orí ọ̀kẹ́rẹ́ koko láwo. Ẹ jẹ́ ká dàá'lẹ̀ ká tún un ṣà, ẹran jíjẹ ni ọ̀kẹ́rẹ́ jẹ́ ní ilẹ̀ Yorùbá. Pàápàá jùlọ tí èèyàn bá rí ọ̀kẹ́rẹ́ yíyan-gbẹ, tí wọ́n fi ata sí dáadáa, a máa dáni l'ọ́nàfun tòló. Èrò yí ló wá sọ́kàn mi ní ìjẹta tí mò ń ya àwòrán nínú ọgbà-ìtura kan ní Lọndọn. Ibẹ̀ ni mo ti ya àwòrán ọ̀kẹ́rẹ́ yìí.

Ẹ ṣàkíyèsí pé ńṣe ni mo súnmọ́ ọ tó báyìí, tí kò sì sálọ. Kódà, ọ̀kẹ́rẹ́ yìí nìkan kọ́ ni mo rí o. Wọ́n pọ̀ rẹpẹtẹ nínú ọgbà náà ni. Bí ọmọ ènìyàn ṣe ń gbafẹ́ ni àwọn náà ń gbádùn, láìsí ìbẹ̀rù-bojo kankan. Ìyanu ni èyí máa ń ṣábàá jẹ́ fún àwọn tí wọn bá ṣẹ̀ṣẹ̀ dé ìlú yìí, pàápàá jùlọ àwọn tí wọn ti ẹ̀bá ọ̀dọ̀ wa wá ní ilẹ̀ adúláwọ̀ tí ọ̀kẹ́rẹ́ ti í ṣe èròjà ọbẹ̀.

Ìdí abájọ ni pé 'ẹranko ìjọba' ni àwọn ọ̀kẹ́rẹ́ wọ̀nyí jẹ́. Wọ́n sì wà lábẹ́ àbò òfin orílẹ̀èdè yìí pẹ̀lú. Àti pé àwọn ará ìlú yìí ò kí ń fi irúfẹ́ ẹranko yìí ṣe oúnjẹ rárá. Dípò jíjẹ wọ́n, ńṣe ni àwọn èèyàn máa ń fi oúnjẹ lọ àwọn ọ̀kẹ́rẹ́ wọ̀nyí, tí wọ́n a sì máa bá wọn ṣeré. Nítorínáà àwọn ọ̀kẹ́rẹ́ náà mú ọ̀mọ̀ ènìyàn gẹ́gẹ́ bí ọ̀rẹ́, dípò nkan ẹ̀rù. Àwọn Gẹ̀ẹ́sì náà sì fẹ́ràn àwọn ẹranko tó bẹ́ẹ̀ gẹ́, inú ilé ni ajá wọn máa ń ṣábàá bá wọn gbé.

Àmọ́ ní tèmi o, nígbàkígbà tí mo bá rí ọ̀kẹ́rẹ́, ibi tí wọ́n ti ń ta ẹran ìgbẹ́ yíyan-gbẹ ní Bódìjà ni ọkàn mi máa ń lọ.