12/12/12



Òní jẹ́ ọjọ́ kejìlá, oṣù kejìlá, ọdún kejìlálélẹ́gbàá. Káàkiri àgáyé ni àwọn èèyàn dá ọjọ́ òní sí ní ọlọ́kan-òjọ̀kan nítorí bí ònkà ọjọ́ náà ṣe báramu rẹ́gí-rẹ́gí.

Ìyàtọ̀ wà láàrin bí wọ́n ṣe nkọ ọ́ ní ìlànà Amẹ́ríkà àti ti àwọn Oríẹ̀èdè ìyókù. Ní Amẹ́ríkà, ònkà oṣù ni wọ́n máa nkọ ṣáájú ònkà ọjọ́. Ní gbogbo ibòmíràn ẹ̀wẹ̀, ònkà ọjọ́ ní í ṣíwájú kí ti oṣù tó tẹ̀lé e. Àmọ́ lọ́jọ́ òní, ìlànà méjéèjì náà tún báramu. Tí aago méjìlá bá tún wá kọjá ìṣẹ́jú méjìlá àti aaya-ìṣẹ́jú méjìá, gbogbo rẹ̀ a wá báramu rẹ́gí-rẹ́gí tán pátá-pátá poo.

Wọ́n ní àkókò kò dúró de ẹnìkan. Gbàrà tí àkókò yìí bá dé, ó ti tún sáré tẹ̀ síwájú, ó nbá'bi tiẹ̀ lọ. Ó tún di ọdún mọ́kàndínláàádọ́rùn-ún, ní ọjọ́ kíní, oṣù kíní ọdún 2101, tí kíkọ sílẹ̀ rẹ̀ á jẹ́ 01/01/01.

Àyàfi ọmọ tuntun tí a ṣẹ̀ṣẹ̀ bí sáyé, àti àwọn tí Olódùmarè bá fún ní ẹ̀mí gígùn gbọ̀rọ̀-gbọrọ, ṣàṣà ni ẹni tí ò ní tíì jẹ́ ìpè Ẹlẹ́dàá rẹ̀ kí ìgbà náà tó dé o. Ìyẹn tí ayé gan-an kò bá tíì parẹ́.

Comments

Post a Comment

Popular posts from this blog

Kíni ìtumọ̀ "SIM Card" l’édè Yorùbá?

Image
Ní ọjọ́ mélòókan sẹ́yìn, ẹnìkan bèèrè lórí Twitter pé kí l’àá ṣe ń pe “SIM Card” ní èdè Yorùbá. Ibéèrè yìí lo múmi fẹ́ kọ àkọsílẹ̀ ránpẹ́ yìí nítoripé kò ṣeé dáhùn ní gbólóhùn kan lásán. Yorùbá bọ̀ ó pòwe. Ó ní “ẹja l’ẹja ń jẹ sanra”. Èyìí ló dífá fún gbogbo èdè pátápátá kárí aiyé! Àlàyé òwe yìí ni pé eja ni èdè. Èdè míràn sì ni èdè ń mú mọ́ra kí ó fi gbòòrò síi, ìyẹn nípasẹ̀ èdè-àyálò. Bẹ́ẹ̀ ló ṣe rí fún gbogbo èdè l’áyé. Ẹ jẹ́ kí a kọ́kọ́ ṣe àtúpalẹ̀ orúkọ “SIM Card” yìí. SIM Card ni nǹkan kékeré kan tó wà nínu ẹ̀rọ ìbánisọ̀rọ̀ alágbèéká tó sì jẹ́ ọ̀kan nínú àwọn èròjà ti ń mú ẹ̀rọ náa ṣiṣẹ́. Iṣẹ́ tí SIM Card ń ṣẹ ni pé òun ló jẹ́ nǹkan ìdánimọ̀ nínu ẹ̀rọ yìí. SIM Card yìí ni Ilé iṣẹ́ ẹ̀rọ ìbánisọ̀rọ̀ fi ń dá alágbèéká kọ̀ọ̀kan mọ̀n yàtọ̀ sí arawọn. Ike pẹlẹbẹ tí kò tóbi ju bí èkana ọwọ́ lọ ni. Wón sì fi irin ṣe àmì sí ojúkan ike yìí. Inú àmì irin yìí ni wọ́n fi orísìírísìí nǹkan pamọ́n sí. Ọgbọ́n àti òye ìgbàlódé ni gbogbo èyí jẹ́ tó sì dàbí idán lójú aláìmòye. ...
Read more

Etí òkun ìgbafẹ́

Oòrùn farahàn sí wa lópin ọ̀sẹ̀ yìí ní Ìlú Ọba. Bó bá ti rí báun ní ìlú èèbó wa níbí, eré-tete, ó di etí òkun. Àgàgà lọ́dúnnìí tí oòrùn fẹ́ ṣe àjèjì sí wa díẹ̀ ní ilẹ̀ yìí. Ẹni tí kò súnmọ́ etí òkun kankan lè wá adágún omi kan lọ, tàbí odò kan tí etí bèbè rẹ̀ tẹ́ pẹrẹsẹ tó sì ní ìyanrìn díẹ̀ tó ṣeé dùbúlẹ̀ sí. Tàbí kí wọ́n gbọ̀nà papa ìgbafẹ́ kan lọ. Ṣùgbọ́n ọ̀pọ̀lọpọ̀ a máa wọ ọkọ̀ lọ sétí òkun bó ti wù kó jìnnà tó. Àwọn ẹ̀dá a máa yáàrùn bí alángba, wọ́n a máa lúwẹ̀ẹ́ nínú omi òkun, wọ́n á máa súré ka pẹ̀lú ajá wọn. Òórùn ẹran sísùn a sì gbalẹ̀ bíi ti súyà. Ẹ lè tún máa gbọ́ àwọn orin aládùn níbìkọ̀ọ̀kan. Àwọn kan a máa ṣe eré-ìdárayá ọlọ́kanòjọ̀kan, bẹ́ẹ̀ àwọn míràn a bó sínú ọkọ̀ ojú omi. Ìdárayá gbáà ni oòrùn jẹ́ fún wa nílùú yìí o, ìlú òjò àti otútù.
Read more

Mojúbà o!

Image
Yorùbá bọ̀ ó pòwe. Ó ní "Ẹ jẹ́ ká ṣeé bí wọ́n ti n ṣeé kó lè báà rí bí ó tí n rí". Nítorínáà ẹ jẹ́ kí n fìbà f'óníbà, kí n fọpẹ́ fún ọlọ́pẹ́. Mojúbà Ọlọ́run Olófin Olódùmarè ọba àkọ́dá aiyé aṣẹ̀dá ọ̀run. Arúgbó ọjọ́ Adàgbàmápààrọ̀oyè Káábíèsí o! Mojúbà àwọn òbí mi bàbá àti ìyá mi. Ẹkú ìgbìyànjú. Mojúbà gbogbo ẹbí lọ́kùnrin lóbìnrin lọ́mọdé lágbà. Mojúbà gbogbo ọ̀rẹ́ pèlú. Mojúbà gbogbo aṣájú ọ̀mọ̀wé, ọ̀jọ̀gbọ́n, amòye àti olùkọ́ èdè Yorùbá pátápátá. Ẹ jẹ́ kó yẹ mí o ìbà ni mo ṣe.
Read more