Oòrùn farahàn sí wa lópin ọ̀sẹ̀ yìí ní Ìlú Ọba. Bó bá ti rí báun ní ìlú èèbó wa níbí, eré-tete, ó di etí òkun. Àgàgà lọ́dúnnìí tí oòrùn fẹ́ ṣe àjèjì sí wa díẹ̀ ní ilẹ̀ yìí. Ẹni tí kò súnmọ́ etí òkun kankan lè wá adágún omi kan lọ, tàbí odò kan tí etí bèbè rẹ̀ tẹ́ pẹrẹsẹ tó sì ní ìyanrìn díẹ̀ tó ṣeé dùbúlẹ̀ sí. Tàbí kí wọ́n gbọ̀nà papa ìgbafẹ́ kan lọ. Ṣùgbọ́n ọ̀pọ̀lọpọ̀ a máa wọ ọkọ̀ lọ sétí òkun bó ti wù kó jìnnà tó. Àwọn ẹ̀dá a máa yáàrùn bí alángba, wọ́n a máa lúwẹ̀ẹ́ nínú omi òkun, wọ́n á máa súré ka pẹ̀lú ajá wọn. Òórùn ẹran sísùn a sì gbalẹ̀ bíi ti súyà. Ẹ lè tún máa gbọ́ àwọn orin aládùn níbìkọ̀ọ̀kan. Àwọn kan a máa ṣe eré-ìdárayá ọlọ́kanòjọ̀kan, bẹ́ẹ̀ àwọn míràn a bó sínú ọkọ̀ ojú omi. Ìdárayá gbáà ni oòrùn jẹ́ fún wa nílùú yìí o, ìlú òjò àti otútù.
Comments
Post a Comment